بِسْمِ اللَّهِ الرَّحْمَٰنِ الرَّحِيم

سلام آدم پر جو برگزیدہء خدا اور خلیفہ خدا ہیں

سلام شیث پر جو ولی خدا اور پسندیدہ خدا ہیں

سلام ادریس پر جو اپنی دلیل کے ساتھ (جنت میں) مقیم ہیں

سلام نوح پر جن کی دعا قبول کی گئی

سلام ہود پر جن کی اللہ کی طرف سے مخصوص مدد کی گئی

سلام صالح پر جن کو اللہ نے اپنے کرم سے ذی شان قرار دیا

سلام ابراہیم پر جن کو اللہ نے اپنی خلت سے سر فراز کیا

سلام اسماعیل پر جن کو اللہ نے ذبح عظیم کی قرار داد کے ساتھ اپنی جنت سے فدیہ بھیجا

سلام اسحاق پر جن کی ذریت میں اللہ نے نبوت کا سلسلہ رکھا

سلام یعقوب پر جن کو اللہ نے اپنی رحمت سے دوبارہ بینا‏ئی دی

سلام یوسف پر جن کو خدا نے اپنا کرم عظیم فرما کر کنویں سے نجات دی

سلام موسی پر جن کے لئے خدا نے اپنی قدرت سے دریا کو شگافتہ کردیا

سلام ہارون پر جن کو خدا نے اپنی نبوت سے مخصوص فرمایا

سلام شعیب پر جن کو خدا نے ان کی امت پر غالب کیا

سلام داؤد پر جن کے ترک اولی کو الله نے معاف کر دیا

سلام سلیمان پر جن کے لئے خدا کی دی ہوئی عزت کی بدولت قومِ جن تابع ہوگئی

سلام ہو ایوب پر جن کو الله نے بیماری سے شفا دی

سلام یونس پر خدا نے ان کے اس وعده کو پورا کیا جس کی انہوں نے ضمانت کی تھی

سلام عزیر پر جن کو خدا نے مرنے کے بعد دوباره زنده کیا

سلام زکریا پر جو اپنی شدید آزمائش میں بھی صابر رہے

سلام یحیی پر جن کا مرتبہ الله نے ان کی شہادت سے اور بڑھادیا

سلام عیسی پر جو بزبانِ وحی الله کی روح اور الله کا کلمہ ہیں

سلام محمد مصطفی (ص) پر جو محبوب خدا اور پسندیده خدا ہیں

سلام امیر المومنین علی ابن ابی طالب پر جن کو پیغمبر کے بھا‏ئی ہونے کا مخصوص شرف دیا گیا

سلام فاطمہ زہرا دختر رسول پر

سلام ابو محمد حسن مجتبی پر جو اپنے باپ کے وصی وجانشین ہیں

سلام حسین پر جنہوں نے راهِ خدا میں انتہائی زخمی ہونے کے بعد جو جان جسم میں باقی ره گئی تھی وه بھی دے دی

اس پر سلام جس نے مخفی اور آشکار خدا کی عبادت کی

اس پر سلام جس کی خاک میں اللہ نے اثر شفا قرار دیا

سلام اس پر کہ جس کی قبہ کے نیچے دعائیں قبول ہوتی ہیں

اس پر سلام جس کی ذریت سے قیامت تک امام رہیں گے

آخری پیغمبر کے فرزند پر سلام

سردار اوصیاء علی (ع) کے فرزند پر سلام

فاطمۃ الزہرا (س) کے فرزند پر سلام

خدیجہ بزرگ مرتبہ کے فرزند پر سلام

سدرة المنتہی کے وارث پر سلام

جنت جیسی پناه گاه کے وارث پر سلام

زمزم وصفا کے وارث پر سلام

آلوده خاک وخون پر سلام

سلام اس پر جس کا خیمہ پھاڑ ڈالا گیا

چادرِ تطہیر والوں کی پانچویں فرد پر سلام

مسافروں میں سب سے زیاده بیکس مسافر پر سلام

شہیدوں میں سب سے زیاده پر درد شہید پر سلام

اس پر سلام جس کو مجہول النسب لوگوں نے قتل کیا

ساکنِ ارضِ کربلا پر سلام

اس پر سلام جس کو آسمان کے فرشتے روئے

اس پر سلام جس کی نسل سے ائمہ اطہار ہیں

سلام دین کے سردار پر

سلام ان (ائمہ) پر جو حق کی منزلیں ہیں

سلام ان ائمہ پر جو پیشوائے ملت ہیں

ان گریبانوں پر سلام جو خون میں بھرے تھے

ان ہونٹوں پر سلام جو پیاس سے سوکھے ہوئے تھے

سلام ان پر جو ٹکڑے ٹکڑے کئے گئے

سلام ان پر جن کو قتل کے فوراً بعد لوٹ لیا گیا

سلام ہو بے گور وکفن نعشوں پر

[سلام ہو ان جسموں پر دهوپ کی شدت سے جن کے رنگ بدل گئے]

(ارض کربلا پر) بہنے والے خون پر سلام

جسموں سے جدا کردیئے جانے والے اعضاء پر سلام

نیزوں پر اٹھائے جانے والے سروں پر سلام

بے ردا ہوجانے والی مستورات پر سلام

حجت پروردگار عالم پر سلام

آپ پر سلام اور آپ کے پاکیزه آباء واجداد پر سلام

آپ پر سلام اور آپ کے شہید ہونے والے فرزندوں پر سلام

آپ پر سلام اور حمایت حق کرنے والی آپ کی ذریت پر سلام

آپ پر اور آپ کے پہلو میں رہنے والے فرشتوں پر سلام

سلام قتل کئے جانے والے مظلوم پر

سلام ان کے بھائی (حسن مجتبی ع) پر جن کو زہر دیا گیا

سلام جناب علی اکبر پر

[سلام] کم سن شیرخوار پر

سلام ان جسموں پر جن کو (بعد شہادت) لوٹا گیا

سلام نبی کی قریب ترین ذریت پر

سلام ان لاشوں پر جن کو بیابان میں پڑا چھوڑ دیا گیا

سلام ان مسافروں پر جو اپنے وطن سے دور تھے

سلام بے کفن دفن کئے جانے والوں پر

سلام ان سروں پر جن کو جسموں سے جدا کر دیا گیا

راهِ خدا میں اذیّت اٹھانے والے صابر پر سلام

عالم بیکسی میں ظلم کئے جانے والے پر سلام

خاکِ پاک پر رہنے والے پر سلام

قبۂ بلند رکھنے والے پر سلام

اس پر سلام جس کو خدائے بزرگ نے پاکیزه و پاک قرار دیا

اس پر سلام جس پر جبریل نے فخر کیا

اس پر سلام جس کو گہواره میں میکائیل نے لوریاں دیں

اس پر سلام جس کے بارے میں عہد وپیماں کو توڑ دیا گیا

اس پر سلام جس کی حرمت کو ضائع کیا گیا

اس پر سلام جس کا خون ظلم سے بہایا گیا

اس پر سلام جس کو زخموں سے بہنے والے خون میں نہلادیا گیا

اس پر سلام جس کو ہر طرف سے نیزے لگائے جاتے تھے

اس پر سلام جس پر ہر ظلم و ستم روا رکھا گیا

[اس پر سلام جسے اتنی بڑی کائنات میں یکہ و تنہا چھوڑدیا گیا]

اس پر سلام جس کو گرد ونواح کے گاؤں والوں نے دفن کیا

اس پر سلام جس کی شہ رگ کو (بے دردی سے) کاٹا گیا

اس پر سلام جو یکہ وتنہا دشمنوں کی یلغار کو ہٹا رہا تھا

اس ریش اقدس پر سلام جو خون سے سرخ تهی

اس رخسار پر سلام جو خاک آلود تھا

اس بدن پر سلام جو غبارآلود تھا (اس لٹے اور نچے ہوئے بدن پر سلام)

ان دانتوں پر سلام جن پر ظلم کی چھڑی چل رہی تھی

اس [سر اقدس] پر سلام جو نیزه پر اٹھایا گیا

ان جسموں پر سلام جو بیابان میں برہنہ پڑے تھے جن کو ستمگارانِ امت بھیڑیوں کی طرح دوڑ دوڑ کر جھنجھوڑ رہے تھے اور کٹ کھنے درندے بن کر (پامالی اور لوٹ کھسوٹ کے لئے) منڈلا رہے تھے

میرے مولا آپ پر سلام اور آپ کے قبہ کے گرد جمع رہنے والے فرشتوں پر سلام جو آپ کی تربت کو گھیرے رہتے ہیں

اور آپ کے صحنِ اقدس کا طواف کرتے ہیں اور آپ کی زیارت کے لئے حاضر ہوتے ہیں

آپ پر سلام، میں نے آپ کی جانب رخ کیا ہے اور آپ کی بارگاه سے کامیابی کا امیدوار ہوں

آپ پر سلام

آپ پر سلام آپ کی حرمت کو پہچاننے والے کا

اس کا سلام جس کا دل آپ کے غم سے زخمی ہے

اور آپ کے ذکر کے وقت اس کی آنکهوں سے آنسو جاری رہتے ہیں جو آپ کے مصائب سے نہایت دردمند ملول اور بے حال ہے

اس کا سلام جو میدانِ کربلا میں اگر آپ کے ساتھ ہوتا تو تلواروں کی باڑھ پر اپنی جان کو ڈال دیتااور آمادہ موت ہوکر اپنے خون کا آخری قطرہ آپ پر نثار کردیتا

اور باغیوں کے مقابلہ میں آپ کے سامنے جہاد کرکے آپ کی نصرت کرتا اور اپنی روح

اپنا مال اور اپنی اولاد سب کچھ آپ پر فدا کردیتا

اس کی روح آپ کی روح پر نثار ہوتی اور اس کے اہل آپ کے اہل پر فدا ہوتے

اب جبکہ زمانہ نے مجھے مؤخر کردیا اور اس وقت موجود نہ ہونے کی وجہ سے میرے مقدر نے مجھے آپ کی نصرت سے روک دیا

آپ سے لڑنے والوں سے نہ لڑسکا اور آپ کے دشمنوں کے لئے میدان میں آکر کھڑا نہ ہوسکا

تو صبح وشام بیقراری سے آپ کے غم میں رویا کروں گا اور آنسو کے بدلہ آنکھوں سے خون بہاؤں گا

اسی سوزشِ غم اسی رنج وملال کو ساتھ لے کر دنیا سے اٹھ جاؤں گا

مولا میں گواہی دیتا ہوں کہ آپ نے نماز کو قائم کیا

برائیوں اور سرکشی سے روکا

آپ نے خدا کی اطاعت کی کبھی اس کی نافرمانی نہیں کی

آپ ہمیشہ خدا کی نا فرمانی سے ڈرے

آپ نے ہمیشہ اس کی رضا کو پسند کیا

آپ نے سنتِ خدا اور رسول (ص) کو قائم کیا

آپ خدا کے مطیع رہے

اور اپنے جد محمد مصطفی (ص) کے پیرو رہے

اور اپنے باپ کے تابع فرمان رہے

اور اپنے بھائی حسن (ع) کی وصیت کو جلد پورا کیا

آپ ہیں ستونِ دین کو بلند کرنے والے

اور سرکشوں کے سروں کو ضرب نیزه و شمشیر سے کچل دینے والے

اور موت کے بھنور تیرنے والے

اور اہل فسق وفجور کا مردانہ وار مقابلہ کرنے والے

اسلام اور مسلمین کے لئے دل میں رحم رکهنے والے

اور سخت آزمائش کے وقت صبر کرنے والے

دین کی حفاظت کرنے والے

اور دین پر حملہ کرنے والوں کا منہ پهیردینے والے

اور عدل وانصاف کی نشر و اشاعت کرتے رہے

دین کی نصرت وحمایت کرتے رہے

اور دین کی حقارت کرنے والوں کی روک ٹوک اور ڈانٹ ڈپٹ کرتے رہے

آپ طاقتور سے کمزور کا حق دلاتے تھے

اور حکم میں طاقتور اور کمزور کو برابر رکهتے تھے

آپ یتیموں کی بہار تھے

آپ کے پاس احکام الہی کا سرمایہ تھا

اپنے جد امجد اور پدرِ نامدار کے طریقوں پر چلنے والے

اور اپنے بھائی کی طرح امر خیر کی ہدایت فرمانے والے

آپ کی سخاوت اظہر من الشمس

آپ کی ہر عادت بزرگانہ شان کی حامل

آپ کی ہر سبقت عظیم الشان

آپ کا ہر مرتبہ بلندتر

آپ کے خصائل سب پسندیده

آپ کی بخششیں نہایت قیمتی

خدا کے غضب سے ڈرنے والے

آپ رسول (ص) کے فرزند ہیں

قرآن کے لئے سند ہیں

امت کے لئے دست و بازو ہیں

طاعت خدا میں تعب اٹهانے والے

عہد وپیمان کی حفاظت کرنے والے

بدکاروں کے راستوں سے الگ تھلگ

مصیبت زده کو عطا کرنے والے

طولانی رکوع وسجده کرنے والے

دنیا کو اس طرح چھوڑ دینے والے جیسے دنیا سے رخصت ہونے والے دنیا سے سیر ہوتا ہے

دنیا کو آپ نے ہمیشہ نفرت کی نگاه سے دیکها

آپ کی آرزوئیں دنیا سے ہٹی ہوئی تھیں

دنیا کی آرائش سے آپ کوسوں دور تھے

رونق دنیا سے آپ کی نگاہیں پھری ہوئی تھیں

اور دنیا جانتی ہے کہ آپ کا میلان خاطر بس آخرت کی طرف تھا

یہاں تک کہ جب ظلم وجور اپنے ہاتھ بہت بڑھانے لگا

اور ظلم کے چہرہ پر جو ہلکا سا پرده تھا وه بھی نہ رہا

گمراہی نے اپنے چیلوں کو ہر طرف سے بلا لیا

اس وقت آپ اپنے [جد امجد] کے حرم میں مقیم تھے

ظالموں سے دور تھے

گوشہ نشین تھے اور محرابِ عبادت میں محوِ عبادت تھے

دنیا کی لذتوں اور خواہشوں سے کناره کش تهے

اور اپنی طاقت کے مطابق اور امکان کی حد تک اپنے دل وزبان سے حرام سے بچنے کی ہدایت بھی کرتے رہے تھے

(آپ سے بیعت یزید کا مطالبہ ہوا) اور آپ کے حقیقت شناس علم نے طے کرلیا کہ بیعت سے انکار ہو

اور بیعت نہ کرنے کی وجہ سے جو لوگ قتال کریں ان فاجروں سے جہاد کریں

فوراً آپ اپنی اولاد اہلِ خاندان اپنی فرمانبردار جماعت کو لے کر چلے

آپ نے حق اور روشن دلائل کو واضح کر دیا

اور خلق خدا کو حکمت اور پسندیده موعظہ کے ساتھ خدا کی طرف دعوت دی

اور حدود شریعت کے قائم کرنے کا

محرمات سے بچنے اور سرکشی سے باز رہنے کا حکم دیا

لیکن ستمگاروں نے ظلم وعداوت سے آپ کا مقابلہ کیا

آپ نے پہلے تو ان کو غضب خدا سے ڈرایا اور حجت ہدایت کی مضبوطی کی

آخرکار جب انہوں نے آپ کے بارے میں ہر عہد کو توڑدیا

اور اپنی شقاوت سے انہوں نے آپ کے خدا اور آپ کے جد امجد کو غضبناک کیا

اور آپ سے لڑنے کی پہل اپنی طرف سے کی

تو پھر آپ بھی ضرب نیزه وشمشیر کے لئے میدان میں آگئے

اور بدکاروں کے لشکروں کو پیس ڈالا، آپ جنگ کے گہرے غبار میں دھنسے ہوئے

ذوالفقار سے حیدر کرار کی طرح قتال کر رہے تھے

اعداء نے جب آپ کے دل کو مضبوط اور بالکل بے خوف و ہراس دیکھا

تو آپ کے لئے اپنے مکر کے جال بچھانے لگے، اور اپنی مخصوص سفیانی چالاکیوں اور شرارت کے ساتھ آپ کے ساتھ قتال کرنے لگے

ملعون عمر بن سعد نے اپنے لشکروں کو حکم دے دیا کہ پانی حسین (ع) تک نہ پہنچ سکے

سب لوگ تیزی کے ساتھ آپ سے قتال کرنے لگے اور پے در پے ملے جلے حملے ہونے لگے

آپ کو تیروں سے چھلنی کر دیا

سب نے ظلم و ستم کے ہاتھ آپ کی طرف بڑھادیئے

نہ انہوں نے آپ کے بارے میں اپنی کسی ذمہ داری کو دیکھا نہ یہ کہ آپ کو اور آپ کے ساتھیوں کو قتل کرنے میں اور آپ کے سامان کو لوٹنے میں وه کتنے زبردست گناه کے مرتکب ہوں گے!

آپ غبار جنگ میں دھنسے ہوئے تھے اور ہر ایک اذیت اٹھا رہے تھے

آپ کا صبر دیکھ کر تو ملائکہ افلاک بھی تعجب کررہے تھے

ظالموں نے ہر طرف سے آپ کو گھیرلیا

اور زخم پر زخم پہنچا کر آپ کو مضمحل کردیا

دم لینے کی مہلت نہ دی

آپ کا کوئی مددگار نہ رہا تھا

بیکسی کے عالم میں انتہائی صبر وضبط کے ساتھ

آپ اپنی مستورات اور بچوں کی طرف سے ہجوم اشقیاء کو ہٹا رہے تھے

یہاں تک کہ انہوں نے آپ کو گھوڑے سے گرادیا

آپ زخموں سے چور ہوکر زمین پر گرے

لشکر کے گھوڑے اپنے سموں سے آپ کو کچل رہے تھے

اور سرکش ستمگر اپنی تلواریں لئے آپ پر چڑھے چلے آتے تھے

موت کا پسینہ آپ کی پیشانی پر آیا ہوا تھا

اور آپ کے دست و پا ادهر ادهر سمٹتے اور پھیلتے تھے

آپ چشم نیم وا سے اپنے کنبہ اور اپنے بچوں کو دیکھ رہے تھے

حالانکہ اس وقت آپ کی خود کی حالت تو ایسی تھی کہ آپ کو اپنے کنبہ کا اور بچوں کا دهیان نہ آسکتا تھا

اس وقت آپ کا گھوڑا ہنہناتا اور روتا ہوا آپ کے خیام کی طرف چلا

جب اہلِ حرم نے آپ کے رہوار کو بے سوار دیکھا

اور زین اسپ کو نیچے ڈھلکا ہوا دیکھا

تو بے قرار ہوکر خیموں سے نکل پڑیں

بال بکھرائے ہوئے

منہ پر طمانچے مارتے ہوئے جبکہ پردے کا دھیان نہ تھا

نوحہ وبکا کرتے ہوئے اپنے بزرگوں کو پکارتے ہوئے

جبکہ اپنی اس مخصوص عزت و شوکت کے بعد حقارت کی نظر سے دیکھے جا رہی تھیں

سب کے سب [آپ] کی قتل گاہ کی طرف تیزی سے جا رہے تھے

آه شمر اس وقت آپ کے سینے پہ بیٹھا ہوا تھا

اور اپنا خنجر آپ کی گردن پر پهیررہا تها

ریشِ مبارک ظالم اپنے ہاتھ میں لئے ہوئے

اپنی ہندی تلوار سے آپ کو ذبح کر رہا تها

آپ کے دست وپا بے حرکت ہوگئے (آپ کے ہوش و حواس ساکن ہوگئے)

اور سانس رک گیا

نیزه پر سر اقدس کو اٹھایا گیا

اور اہلِ حرم کو غلاموں کی طرح قید کرلیا گیا

اور آہنی زنجیروں میں جکڑ کر اونٹوں پر بٹھالیا گیا

دن کے دوپہر کی گرمیاں ان کے چہروں کو جھلسا رہی تھی

اور وه غریب بیابانوں اور جنگلوں میں پھرائے جا رہے تھے

ہاتھ ان کے گردنوں سے بندھے ہوئے تھے

اور بازاروں میں ان کو پھرایا جا رہا تھا

وائے ہو ان نافرمانوں فاسقوں پر

جنہوں نے آپ کو قتل کرکے اسلام کو تباه کردیا

نمازوں کو روزوں کو معطل کردیا

شریعت کے چلن کو اور احکام کو توڑدیا

ایمان کی عمارت کو ڈھا دیا

اور قرآنی آیات میں تحریف کی

اور بغاوت وسرکشی میں دھنستے چلے گئے

آپ کے قتل سے رسول الله (ص) مظلوم قرار پاگئے

آپ کے قتل سے کتابِ خدا پر لاوارثی چھا گئی

اور آپ کے ستائے جانے سے اصل میں حق ستایا گیا

آپ کے نہ ہونے سے اللہ اکبر اور لا الہ الا اللہ ان آوازوں میں کوئی روح نہ رہی

حرام و حلال کا امتیاز، قرآن اور قرآن کے معانی کا تعین سب ضائع ہوگیا

آپ کے بعد شریعت میں کهلی ہوئی تبدیلیاں، فاسد عقیدے سے حدود شریعت کا تعطل، نفسانی خواہشوں کا زور، گمراہیاں فتنے اور غلط چیزوں کا ظہور ہوا

غرض کہ آپ کی سنانی سنانے والا آپ کے جد امجد کی قبر کے پاس کهڑا ہوا

اور آپ کی سنانی برستے ہوئے آنسوؤں کے ساتھ رسول الله (ص) کو یہ کہتے ہوئے سنائی کہ:

یا رسول الله! آپ کا فرزند آپ کا بچہ قتل کردیا گیا

اور آپ کے گھروالوں اور جانثاروں کو ماردیا گیا

آپ کے بعد آپ کی ذرّیت کو قید کیا گیا

اور آپ کی ذریت و اہل بیت کو وہ دکچ دیئے گئے جن سے ان کو بچانا امت پر فرض تھا۔

روح اسلام کو انتہائی قلق ہوا اور آنحضرت کا قلب نازک گریاں ہوا

ملائکہ اور انبیاء نے ان کو آپ کا پرسہ دیا

آپ کے قتل ہونے سے آپ کی ماں فاطمہ زہرا (س) بے تاب ہوگئیں

ملائکہ مقربین کے ایک کے بعد ایک لشکر اترنے لگے جو آپ کے باپ امیرالمومنین (ع) کو پرسہ دے رہے تهے

اور اعلی علیین میں آپ پر نوحہ وماتم کررہے تهے

آپ کے غم میں حورانِ جنت اپنا منہ پیٹ رہی تهیں

آسمان اور آسمان کے باشندے آپ پر روئے

اور جنت کے خزینہ دار روئے

پہاڑ قطار در قطار روئے

دریا اور دریا کی مچھلیاں

جنت اور غلمان

[مکہ اور مکہ کی عمارتیں] کعبہ اور مقامِ ابراہیم

مشعر حرام

حل و حرم سب ہی آپ کے غم میں گریاں ہوئے

خداوند اس بلند مرتبہ مقام کی حرمت کا واسطہ

محمد و آل محمد پر درود بھیج

اور مجھ کو ان کے گروه میں محشور فرما

اور ان کی سفارش سے مجھے داخل جنت فرما ۔ اے کم سے کم وقت میں ہر ایک کا حساب کرنے والے

اے ہر بزرگ سے کہیں زیاده بزرگ تر

اے عالم حاکموں سے زیاده زور حکومت رکهنے والے

واسطہ حضرت محمد مصطفی (ص) کا جو تیرے آخری پیغمبر اور تمام عالم کی طرف تیرے رسول ہیں

اور ان کے بھائی کا واسطہ جو کشاده پیشانی اور معدنِ علم وحکمت اور ہر علم میں راسخ ہیں یعنی امیر المومنین علی مرتضی (ع)

اور فاطمہ زہرا (س) کا واسطہ جو زنانِ عالم کی سردار ہیں

حسن مجتبی (ع) کا واسطہ جو پاک وپاکیزه اور پرہیزگاروں کی پناه گاه ہیں

اور ان کی قتل ہونے والی [اولاد] کا واسطہ

اور ان کی مظلوم ذریت کا واسطہ

اور علی بن حسین زین العابدین (ع) کا واسطہ

اور محمد بن علی (ع) کا واسطہ جو عبادت گذاروں کے قبلہ ہیں

اور جعغر بن محمد (ع) کا واسطہ جو مجسمۂ صداقت ہیں

اور موسی بن جعفر (ع) کا واسطہ جو دلائل حق کو ظاہر کرنے والے ہیں

اور علی بن موسی (ع) کا واسطہ جو دین کے مددگار ہیں

اور محمد بن علی (ع) کا واسطہ جو اہل حق کے پیشوا ہیں

اور علی بن محمد (ع) کا واسطہ جو زاہدوں سے کہیں زیاده زاہد ہیں

اور حسن بن علی (ع) کا واسطہ جو ائمہ اطہارؑ کے وارث ہیں

اور اس فرد کا واسطہ جو تمام خلق پر حجت ہیں

محمد و آل محمد پر درود بھیج

جو صادقین میں بہترین نیکیوں کے حامل جن کا لقب آل طہ و آل یسین ہے

اور مجھے قیامت میں امن پانے والوں میں سے صاحبان اطمینان میں سے

کامیاب ہونے والوں میں سے، خوش وخرم اور بشارت جنت پانے والوں میں قرار دے

خداوندا مجھے اپنے فرمانبرداروں میں سے قرار دے (میرا نام مسلمانوں میں لکھ لے)

اور صالحین سے وابستہ رکھ

میرے بعد نیکی اور بھلائی سے میرا ذکر ہو

جو بغاوت وسرکشی کرنے والے ہیں ان کے مقابلہ میں مجھے فتح دے

مجھے حاسدوں کے شر سے بچا

اور بری تدبیر کرنے والوں کی تدبیر کا رخ میری طرف سے پھیردے

ظالموں کے ہاتھوں کو مجھ پر ظلم کرنے سے روک دے

اور مجھے میرے با برکت پیشواؤں کو (محمد و آل محمد) اعلی علیین میں ایک جگہ مجتمع کردے

انبیاء، صدیقین، شہدا اور صالحین کی رفاقت نصیب ہو کیونکہ ان حضرات کو تو نے اپنی نعمتوں سے مالامال کیا ہے

اپنی رحمت کے واسطے سے، اے سب سے زیادہ رحم کرنے والے۔

قسم دیتا ہوں خداوندا میں تجھ کو تیرے نبی معصوم (ص) کی

اور تیرے حتمی احکام کی، اور گناہوں سے بچنے کے لئے تیرے مقرره ارشادات کی

اور اس قبر مطہر کی جس کی زیارت کے لئے ہر طرف سے جن وانس وملک پہنچتے ہیں، جس کے پہلو میں امام معصوم شہید ظلم وستم آرام فرما رہے ہیں

کہ میرے رنج وغم کو دور کردے

اور میرے مقدر کی برائی کو ہٹادے

اور مجھے جہنم کی آتشِ سوزاں سے پناہ دے

اے اللہ! میرے چاروں طرف اپنی نعمتوں کا انبار لگادے اور مجھے اتنا دے کہ میں خوش و خرم رہوں (مجھے اپنی تقسیم کی ہوئی روزی پر راضی رکھ)

مجھے اپنے فرمان برداری کی نصیب بنائیں۔

اور اپنے کرم کے ساتھ مجھے اختیار کر لے

اور اپنی سزا اور عتاب سے دور رکھ

خداوندا مجھے ہر لغزش سے بچا

میرے قول و عمل کو درست کر

مجھے عمر دراز دے

اور امراض و اسقام سے بچا

اور مجھے میرے پیشواؤں کے وسیلہ سے اور اپنے فضل سے میری بہترین تمناؤں تک پہنچا

خداوندا رحمت خاص نازل فرما محمد (ص) و آل محمد (ع) پر، اور میری توبہ کو قبول فرما

اور مجھے روتا دیکھ کر رحم فرما

میرے گناه بخش دے

میرے رنج و ملال کو دور کر

میری خطا کو بخش دے

میری اولاد کو نیک اور صالح قرار دے

خداوند اس عظیم المرتبہ شہادت گاه اور اس بزرگ مرتبہ مقام پر (میری حاضری کا یہ نتیجہ) کہ میرے گناہ تو بخش چکا ہو

میرے ہر عیب کو تو چھپا چکا ہو

میرے ہر غم کو تو دور کرچکا ہو

میرے رزق میں تو کشائش کرچکا ہو

میرے گهر کے آباد رہنے کا تو حکم نافذ کرچکا ہو

میرے کاموں کے ہر بگاڑ کو تو درست کرچکا ہو

میری ہر آرزوئے دل کو تو پورا کرچکا ہو

میری ہر دعا کو تو قبول کرچکا ہو

میری ہر تنگی کو تو زائل کرچکا ہو

میرے ہر انتشار کو تو اطمینان سے بدل چکا ہو

میرے ہر کام کو تو تکمیل تک پہنچا چکا ہو

میرے ہر مال کو تو زیادہ سے زیادہ کرچکا ہو

اور میرے ہر خلق کو تو نیک کرچکا ہو

اور میرے ہر انفاق کو تو عوض دے کر پورا کرچکا ہو

اور میرے ہر حال کو آباد کرچکا ہو

اور میرے ہر حاسد کو تو تباه کر چکا ہو

اور میرے ہر دشمن کو تو ہلاک کرچکا ہو

اور مجھے ہر شر سے تو بچا چکا ہو

اور مجھے ہر بیماری سے تو شفا عطا کرچکا ہو

اور میرے ہر ایک اپنے کو جو دور ہو تو اس کو قریب کرچکا ہو

اور میری پریشانی کو تو اطمینان سے بدل چکا ہو

اور میرا ہر سوال تو مجھ کو عطا کرچکا ہو

خداوندا میں تجھ سے اس دنیا کی بہتری کا سوال کرتا ہوں

اور اس جہانِ باقی کے ثواب کا سوال کرتا ہوں

خداوندا مجھے وجہ حلال سے اتنا دے کہ میں حرام سے بے نیاز ہوجاؤں

اور اپنا فضل اس درجہ میرے شاملِ حال رکھ کہ مجھے کسی کی ضرورت ہی نہ ہو

بار الہا میں تجھ سے اس علم کا سوال کرتا ہوں جو نفع بخش ہو

اور اس دل کا جس میں تیرا خوف ہو

اور اس یقین کا جو ہر شک کو دور کردے

[پاکیزه اور مخلصانہ عمل]

[مثالی صبر]

اور اس اجر کا جو فراوان ہو

خداوندا مجھے توفیق دے کہ تیری نعمتوں کا شکر ادا کروں

اور اپنا احسان وکرم مجھ پر زیاده سے زیاده فرما

اور ایسا کر کہ سب لوگ میری بات کو مانیں

اور میرا ہر عمل تیری بارگاه میں قبولیت کی بلندی حاصل کرے

اور نیکیوں میں لوگ میرے نقشِ قدم پر چلیں (یعنی نیکوں کے لئے میں ایک نمونہ بن جاؤں)

خداوندا میرے دشمن کو بر باد کردے

بار الہا رحمت خاص نازل فرما محمد (ص) و آل محمد (ع) پر جو تیری تمام مخلوق میں بہتر سے بہتر ہیں

اور شریر لوگوں کے مقابلہ میں تو میری حمایت کر

اور مجھے گناہوں سے اور گناہوں کے بار سے پاک کردے

اور مجھ کو جہنم سے پناه دے

اور راحت وآرام کے مقام (جنت) میں آباد کردے

اور میرے تمام دینی بھائی بہنوں مومنین ومومنات کو اے سب سے زیاده رحم فرمانے والے اپنے رحم وکرم سے بخش دے۔

اپنی رحمت کے واسطے سے، اے سب سے زیادہ رحم کرنے والے۔